CD Rohdiamant

Veröffentlicht: 2005

order CD download MP3

©2005 music & lyrics by Ruth Bucherer

Uf dere CD isch en Uswauh vo Lieder, wo mir Gott vo 1996-2004 gschänkt het – i umgekehrter chronologischer Reihefoug. Wüu i zwöi Jahr in Ängland gläbt ha u dört mini erschte Lieder entstande si, hani lang nume änglischi Tegschte gschribe, aber sit es paar Jahr lige mir bärndütschi Worshiplieder ufem Härz, u drum si di nöie Songs schwizerdütsch.
D Ufnahm vo dene acht Lieder isch e Mischig zwüsche spontan-Worship, unplugged und Demo-CD. Ganz simpel zäme iigspiut, je nach Lied ei bis zwe Priise Schliff bim abmixe – und fertig ischer gsi, dä “Rohdiamant”. Är isch usem Wunsch enstande, Dir mini Lieder zuegänglech z’mache und se i ihrer (fasch) ursprüngleche Form z’präsentiere, was viu Ruum für Kreativität und nöiji Ideä laht.
Mini Lieder entstöh oft i Zite woni emotional gseh in Not bi, d.h. we mi Frage u Gfüeuh nid loslöh, aber o weni mi eifach nach Zwöisamkeit mit Gott sehne. Bim Klavierspile erläbi nid säute extrem berüehrendi Momänte wo mi Vater im Himu zu mim Härz redt.
Es isch mi Wunsch, das Gott Di dür die Lieder cha berüehre und Di nöcher zu sich häre zieht, und dass Du das chasch in Empfang näh, won är Dir gärn würd gäh:

Ich will euch ein anderes Herz und einen neuen Geist geben. Ich nehme das versteinerte Herz aus eurer Brust und gebe euch ein lebendiges Herz.  [Hesekiel 36,26]

Das setzt voruus, das mir Gott üses ganze Härz aavertroue, de chan är üs zumne wunderschöne Diamant forme, wo sini Liebi reflektiert.